兩年前去東北旅遊，當日下午上機時已發覺唔舒服。落機時更覺得頭重腳輕，全身發興。去到仙台市馬上食飯，返酒店睡覺，但整晚都睡不著。
第二朝8:00起身，見越來越嚴重，便換衫出酒店，拿著地圖找醫院。去了兩三間，格局唔似有醫生睇。無計可施，最後行去仙台車站旁的警察更亭，問那處有醫生睇。最後知道行出更亭一個街口有醫院[病院]。
我入到"病院"，有唔少人坐係大堂度等。我走到大堂櫃台問職員，同她講"我是遊客，我好似傷風，請問可否睇醫生？(當然用日文問)"。她問我"有沒有保險証"，我答沒有。她打了一個電話，講了數十秒。之後從櫃桶拿出"問診票"，請我坐下填上。問題離唔開幾個問題。
1. 有甚麼唔舒服？幾時發生？
2. 有沒有慢性病？有沒有藥物敏感？
3. 是否大肚？
我坐下，慢慢地回答問題(也是用日文)。數分鐘後職員站在我面前，要我的護照。接著數分鐘後，問我的名的"ふりがな"是甚麼。攪了一輪，才完成掛號。
之後，拿著病歷表去"診察室"等睇醫生。去到把病歷表交給姑娘嬸嬸，她給我一支像溫度計的電子探針。因為唔知點用，只是拿著發呆。她見我冇反應，講了一堆日文。我聽唔明，最後她做動作，原來探熱針是放在腋下。我照做，第一次探不到、第二次探不到。第三次要等成十分鐘，直到聽到那支針響才可以從腋下拿出來。她見到我有發燒，便給了我口罩，要我馬上戴著。
之後度高磅重量血壓，最後見醫生。係房間出面有一個大籃子，可以把隨身物件，例如手袋放在這裏。醫生看完"問診票"，做同香港睇醫生一樣會做的事。之後講了一堆日文，我聽唔清楚，隔離的姑娘嬸嬸好似對老人家一樣，好慢咁同我講一次。原來醫生問我從何處來，會係日本停留幾耐。結論是感冒，最後開了五日藥俾我。
把病歷表交回大堂櫃台，找數，拿藥單[処方箋]。職員問我識唔識去藥房[薬局]，我話唔識，她便領我出門口，指著隔離的"薬局"。最後45度鞠躬，目送我離開。
拿著"処方箋"，走到隔離的"薬局"。藥房很細間，大約800尺左右。門口旁邊有幾個櫃位，而櫃位後面是一間玻璃房。裏面有一大堆櫃桶，幾個藥劑師在裏面工作。
我把藥單交了給職員，然後坐在沙發上。一陣間有位職員拿著登記表，走到我面前半跪著，想要我的保險証。我當時坐在沙發上，要低頭才能和她說話(若果去過和民居食屋食過飯，就是向侍應點菜時的情況)。我告訴他沒有保險証，她便不同我填登記表。
過了一陣，聽到櫃位有人叫我的名字，我便走到櫃位前站著。藥劑師站在我前面，拿著藥同埋藥物說明，向我講解每種藥的功用。她見我聽唔明佢講甚麼，便拿著其中一種藥，告訴我這種藥會令人眼瞓。我表示明白後，便請我付款。
拿到藥，已經是上午11:30。返回酒店，整個上午甚麼都沒有吃，吃下藥馬上睡覺，再次起床時已經是晚上8:00。
睇醫生用了3,580円，之後取藥又用了2,440円，合共6,020円。一般感冒係香港就算要五日藥，一定唔使這個數。今次睇醫生唔需要用傳譯，若果唔係一定唔止這個數。
Add new comment